ጣቢያ - ስለዚህ ገጽ

ሱንካሳ በድሬዳዋ (ኢትዮጵያ)፣ በኪጋሊ (ሩዋንዳ) እና በጆሃንስበርግ (ደቡብ አፍሪካ) የአየር ንብረት ለውጥ መላመድንና የብዝኃ ሕይወት ጥበቃን ለማጎልበት በየአካባቢዎቹ ለተለዩ ፍላጎቶችና ቅድሚያ ለሚሰጣቸው ጉዳዮች በቀጥታ ምላሽ በመስጠት እየሠራ ይገኛል። ለተፋሰስ ጥበቃና መልሶ ልማት ሥርዓተ-ጾታን ያማከሉና ተፈጥሮ ላይ መሠረት ያደረጉ መፍትሔዎችን ተግባራዊ የሚያደርገው ይህ ዕቅድ የጎርፍ መጥለቅለቅን ጨምሮ ከተሞች ከአየር ንብረት ጋር ተያያዥነት ያላቸው በርካታ ስጋቶችን መቋቋም እንዲችሉ አቅማቸውን ለማጎልበት ያለመ ነው።

ይህ ሥርዓተ-ጾታን ያማከለና ተፈጥሮ ላይ መሠረት ያደረገ መፍትሔ ከፍተኛ የጎርፍ አደጋ ስጋት ባለባቸው አካባቢዎች የሚኖሩ 2.2 ሚሊዮን እንደሚሆኑ የሚገመቱ ሰዎችን በቀጥታ ተጠቃሚ የሚያደርግ ይሆናል። በተጨማሪም ፕሮጀክቱ በሚያመጣው ዘላቂ የአየር ንብረት መፍትሔ ምክንያት 7 ሚሊዮን የሚሆኑ ነዋሪዎች ኑሯቸው የሚሻሻል ከመሆኑም ባሻገር ከተማዋ የውሃ እጥረትንና ሙቀትን እንዲሁም የመሬት መንሸራተትንና የአፈር መሸርሸርን ለመቋቋም ያላት አቅም ይጨምራል።

ሱንካሳ ተግባራዊ ከሚያደርጋቸው ተፈጥሮ ላይ መሠረት ያደረጉ መፍትሔዎች መካከል በድሬ ዳዋና በኪጋሊ የተራቆቱ መሬቶችን መልሶ ማልማት፣ በኪጋሊ የተራቆቱ የከተማ ደን መሬቶችን መልሶ ማልማትና መልሶ ማቋቋም እንዲሁም በጆሃንብሰርግ የጁክስኬይ ተፋሰስን ወረው የሚገኙ ባዕድ ዝርያዎችን ማስወገድ ይገኙበታል። ከመልሶ ማልማት ተግባራት ጎን ለጎን ሱንካሳ የተፋሰስና ረግረጋማ አካባቢዎችን የመልሶ ማልማት ሥራ የሚያከናውን ሲሆን የከተማ የዛፍ ሽፋንን በመጨመር በሦስቱም አቅጣጫዎች የከተማ የሙቀት ችግርን ለመፍታት ያስችላል።

የምንከተለው ዘዴ

የሱንካሳ ስኬት በሦስት ወሳኝ ሐሳቦች ላይ የተመሠረተ ነው። በመጀመሪያ ስለአየር ንብረት ለውጥ ተወራራሽ የሥርዓተ-ጾታ ተጽእኖዎች የተሻለ ግንዛቤ ሲኖር ሥርዓተ-ጾታን ያማከሉና ተፈጥሮ ላይ መሠረት ያደረጉ መፍትሔዎችን በተመለከተ ግልጽነት እንዲዳብር ያደርጋል። ሁለተኛው በየአካባቢዎቹ ያሉ አጋር አካላት ከአየር ንብረት ጋር የተያያዙ ስጋቶችን ለመቅረፍ ተፈጥሮ ላይ መሠረት ያደረጉ መፍትሔዎችን መጠቀም ውጤታማና ከወጪም አንጻር አዋጭ መንገድ መሆኑን የሚቀበሉ መሆናቸው ነው። ሦስተኛው ደግሞ የማዘጋጃ ቤት ኃላፊዎችና ሌሎች ባለድርሻ አካላት አሁን ያሉት የአስተዳደር ማዕቀፎች ሥርዓተ-ጾታን ያማከሉና ምላሽ ሰጪ እንዲሆኑ ማስተካከያዎችን ለማድረግ ቁርጠኛ መሆናቸው ነው።

ግቦቻችን

የሱንካሳ ዕቅድ ዓላማዎች የሚከተሉት ናቸው፡-
•   የጎርፍ አደጋን ለመቀነስና አስተማማኝ የውሃ አቅርቦት እንዲኖር ለማድረግ የወንዞችን ተፋሰስ መልሶ በማልማትና በማደስ ሥርዓተ-ጾታን ያማከሉና ተፈጥሮ ላይ የተመሠረቱ መፍትሔዎችን ማዳበርና መተግበር
•   ሴቶችና በቂ ውክልና የሌላቸው ቡድኖች በአየር ንብረት መላመድ ውሳኔ አሰጣጥ፣ ዕቅድ፣ አቅርቦትና ክትትል ላይ የሚገጥማቸውን እንቅፋት በማስወገድ የሥርዓተ-ጾታ እኩልነትንና ማኅበራዊ ፍትሕን ማጎልበት
•   ዘላቂ መተዳደሪያ እንዲኖር ማድረግና የአካባቢዎቹን ብዝኃ ሕይወት መጠበቅ
•   አካባቢ ላይ ጉዳት የማያደርሱ (አረንጓዴ) የሥራ ዕድሎችን መፍጠር
•   አረንጓዴ የሕዝብ ቦታዎችን በማልማት የማኅበረሰቡን ደኅንነት ማሻሻል